Қоғозда бор, амалда йўқ: Навоийда 1,3 млрд сўмлик маблағ талон-торож қилинди
Мазкур ҳолат юзасидан жиноят иши қўзғатилган.
Бош прокуратура ҳузуридаги Департаментнинг Навоий вилояти бошқармаси томонидан ўтказилган терговга қадар текширувда бюджет маблағларини талон-торож қилиш билан боғлиқ ҳолат аниқланди.
Маълум қилинишича, «Навоийсувқурилишинвест» ДМ, Қуйи Зарафшон ирригация тизими ҳавза бошқармаси ҳузуридаги мелиоратив экспедиция, шунингдек, «Н. С.» ва «Б. З.» МЧЖларнинг масъул шахслари ўзаро тил бириктирган.
Улар шартномаларга асосан «DIVER» қурилмалари учун тўловлар тўлиқ амалга оширилган бўлса-да, қўшиб ёзиш орқали 1,3 млрд сўмлик бюджет маблағларини ўзлаштириш ёки растрата йўли билан талон-торож қилгани аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилган. Ҳозирда тергов ҳаракатлари олиб борилмоқда.
