Овчилар учун янги тартиб: гувоҳнома энди онлайн берилади
Гувоҳнома 18 ёшга тўлган, махсус курс ва тест синовларидан ўтган фуқароларга 2 йил муддатга берилади.
Ўзбекистонда овчиликка оид ҳужжатларни расмийлаштириш тартибига ўзгартиришлар киритилди. Тегишли қонун 2026 йил 9 сентябрда имзоланди.
Киритилган ўзгартиришларга кўра, ов қилиш овчилик хўжаликларига бириктирилган ов қилиш жойларида, шунингдек, Экология ва иқлим ўзгариши миллий қўмитаси томонидан белгиланадиган эркин ов қилиш жойларида амалга оширилади.
Овчилик хўжаликлари ўзларига бириктирилган ҳудудларда питомникларда тўлиқ босқичда етиштирилган ёввойи ҳайвонларни табиатга қўйиб юбориши ва уларнинг сонига тенг миқдордаги ҳайвонларни, уларнинг урчиш давридан ташқари, йил давомида овлашни ташкил этиши мумкин. Бунда ёввойи ҳайвонларни тутиш учун алоҳида рухсатнома талаб этилмайди.
Ёввойи ҳайвонларнинг урчиш даври Ўзбекистон Республикаси Фанлар академиясининг Зоология институти хулосаси асосида белгиланади.
Шунингдек, қонун билан овчилик гувоҳномасини бериш жараёни рақамлаштирилади. Гувоҳнома 18 ёшга тўлган, муомала лаёқатига эга, овчилик гувоҳномасини олиш бўйича махсус ўқув курсларини тамомлаган ва тест синовларидан муваффақиятли ўтган жисмоний шахсларга берилади.
Овчилик гувоҳномаси Экология ва иқлим ўзгариши миллий қўмитаси томонидан Ягона интерактив давлат хизматлари портали — my.gov.uz орқали 2 йил муддатга расмийлаштирилади.
Гувоҳноманинг амал қилиш муддати талабгорнинг аризасига кўра узайтирилиши мумкин.
Мазкур қонун расмий эълон қилинган кундан эътиборан кучга киради.
