АҚШ Эрон нефтини назорат қилиши мумкин — Трамп
Трамп Эрон нефти устидан назорат масаласида Венесуэла сценарийси такрорланиши мумкинлигини айтди.
Дональд Трамп Қўшма Штатлар Венесуэладаги каби сценарий асосида Эрон нефти устидан назорат ўрнатиши мумкинлигини истисно қилмади.
Трамп Ирландиядаги гольф клубида журналистлар билан суҳбатда АҚШ Эрон масаласида нефтни ўз назоратида сақлаб қолишга қарор қилмаса, мамлакатни тарк этиши мумкинлигини айтган.
“Охир-оқибат, агар биз Венесуэладаги каби нефтни ўзимиз учун сақлаб қолишга қарор қилмасак, кетамиз”, — деган АҚШ президенти.
Трампнинг баёноти Эрон билан боғлиқ ҳарбий ва иқтисодий қарама-қаршиликлар давом этаётган бир пайтда янграган. Аввалроқ АҚШ президенти Эронга қарши ҳарбий операция ўтказиш қарорини тўғри деб ҳисоблашини билдирган ҳамда можаро унинг президентлик муддати якунлангунига қадар тугашини айтган.
Шунингдек, Вашингтон Теҳроннинг даромад манбаларини чеклашга қаратилган чораларни кучайтириб, Эрон билан нефть савдоси ва ташишида иштирок этаётган учинчи томонларга нисбатан иккиламчи санкциялар қўллаш билан таҳдид қилган.
Трамп айни пайтда Эрон билан келгусида тинчлик музокаралари ўтказилишини истисно қилмаган.
