Бензин нархи ошди: Сурияда норозилик намойишлари бошланди
Энергетика вазирлиги ҳузуридаги махсус қўмита томонидан газ ва дизель ёқилғиси нархлари 25–40 фоизга оширилган.
Суриянинг бир қатор ҳудудларида ҳукуматнинг ёқилғи нархларини ошириш қарорига қарши норозилик намойишлари бошланди.
Сурия телеканаллари Алеппо, Идлиб, Хасака, Раққа ва Дейр-аз-Зор ҳудудларида намойишлар бўлаётгани ҳақида хабар бермоқда. Айрим жойларда намойишчилар йўлларни тўсиб, шиналарни ёқган. Баъзи ҳудудларда эса ёқилғи ташувчи юк машиналарининг ҳаракатланишига тўсқинлик қилинган.
Хусусан, Идлиб жанубидаги Маарат ан-Нуман шаҳри яқинида мамлакат шимоли ва жанубини боғловчи М-5 халқаро автомагистрали тўсиб қўйилган. Раққада эса хавфсизлик кучлари йўлни очиб, ёнаётган шиналарни ўчирган.
Маълум қилинишича, Сурияда ёқилғи нархлари Энергетика вазирлиги ҳузуридаги махсус қўмита томонидан белгиланади. 12 сентябрь куни қўмита бензин, газ ва дизель ёқилғиси нархларини 25–40 фоизга оширган.
Нархларнинг кескин кўтарилиши мамлакатнинг турли ҳудудларида аҳолининг норозилигига сабаб бўлган.
