Болалар энди Ватанда: Россияда жазо ўтаётган ўзбекистонликларнинг фарзандлари қайтарилди
Улар бу пайтгача жазони ижро этиш муассасаси қошидаги болалар уйида тарбияланган.
Россиянинг Мордовия Республикаси ва Самара вилоятида жазони ўтаётган Ўзбекистон фуқароларининг вояга етмаган уч нафар фарзанди Ўзбекистонга қайтарилди. Бу ҳақда «Дунё» АА хабар берди.
Маълум қилинишича, болаларни ватанга олиб келиш ишлари Ўзбекистоннинг Қозон шаҳридаги Бош консулхонаси томонидан Россия ваколатли идоралари билан ҳамкорликда амалга оширилган.
Жараён давомида вояга етмаганларнинг Ўзбекистон фуқаролиги, мамлакатда яқин қариндошлари борлиги ва уларнинг яшаш шароитлари ўрганилган. Шунингдек, зарур консуллик-ҳуқуқий тадбирлар ўтказилиб, болаларни Ўзбекистонга олиб келиш учун тегишли ҳужжатлар расмийлаштирилган.
Амалга оширилган ишлар натижасида Мордовия Республикасидаги жазони ижро этиш муассасаси қошидаги болалар уйида тарбияланаётган вояга етмаганлар Бош консулхона дипломатлари ҳамда Ўзбекистондан махсус юборилган Ички ишлар вазирлиги ходимлари ҳамроҳлигида Ўзбекистонга олиб келинди.
Қайд этилишича, Қозон шаҳридаги Бош консулхона томонидан Россиядаги жазони ижро этиш муассасалари қошидаги болалар уйларида тарбияланаётган ўзбекистонлик вояга етмаганларни ватанга қайтариш ишлари тизимли равишда давом эттирилмоқда.
