Самарқанддаги портлаш: маҳаллий аҳоли норози
Ҳолат аҳоли яшаш жойларига яқин тоғли ҳудудда содир бўлган.
Ижтимоий тармоқларда Самарқанд вилояти Нуробод туманидаги «Тепақул» МФЙ ҳудудида йирик портлаш содир бўлгани ҳақида тарқалган хабарлар юзасидан Экология бош бошқармаси томонидан ўрганиш олиб борилди.
Маълум бўлишича, портлатиш ишлари Нуробод туманида эмас, балки Самарқанд шаҳри, Гўрўғли кўчаси, 12-уй манзилида жойлашган «САМ НУРАФШОН ГРОУП» МЧЖ томонидан аҳоли яшаш жойларига яқин тоғли ҳудудда амалга оширилган.
Қайд этилишича, мазкур ишлар маҳаллий аҳолининг жиддий эътирозларига сабаб бўлган. Айни пайтда ҳудудда назорат тадбирлари олиб борилиб, давлат инспекторлари томонидан зарур ҳужжатлар ўрганилмоқда.
Шунингдек, ҳолатни белгиланган тартибда текшириш учун Бизнес-омбудсманнинг тегишли жавоб хатига мувофиқ зарур ҳужжатлар тақдим этилган.
Ўрганишлар якунлангач, ҳолатга қонунчилик доирасида ҳуқуқий баҳо берилади. Натижалар юзасидан жамоатчиликка қўшимча маълумот тақдим этилиши маълум қилинди.
