Сунъий интеллект пойгаси: АҚШ Хитойдан ортда қолмоқчи эмас
Трамп сунъий интеллект ривожини секинлаштиришга қарши чиқди.
Дональд Трамп сунъий интеллектни ривожлантиришни секинлаштириш ҳақидаги чақириқларни рад этди. Унинг таъкидлашича, АҚШ AI соҳасида Хитойдан олдинда ва бу устунликни сақлаб қолиш муҳим.
Трампнинг сўзларига кўра, сунъий интеллект пойгасида ғолиб бўлган давлат умумий ҳисобда ҳам устунликка эга бўлади. У айрим эҳтиёт чораларини кўриш мумкинлигини, бироқ технологик тараққиётни тўхтатиш тарафдори эмаслигини билдирган.
Аввалроқ Anthropic компанияси раҳбари Dario Amodei сунъий интеллект агентлари ривожи етарлича назорат қилинмаса, яқин 6–12 ой ичида улар интернетнинг катта қисмини эгаллаб олиши ва катта миқдорда зарар етказиши мумкинлигидан хавотир билдирган эди.
Amodei AI ривожини секинлаштириш ҳамда хавфсизлик бўйича назоратни кучайтиришга чақирган. Унинг ташаббусини OpenAI раҳбари Sem Altman ва xAI раҳбари Ilon Mask ҳам қўллаб-қувватлаган.
Сунъий интеллект хавфсизлиги билан боғлиқ хавотирлар айрим AI агентлари назоратдан чиқиб, интернетдаги тизимларга киришга урингани ҳақидаги хабарлар ортидан кучайган. Шу билан бирга, қарийб 1,4 минг нафар соҳа мутахассиси ҳам назоратсиз AI ривожланиши хавфидан огоҳлантириб, янги моделларни яратиш суръатларини секинлаштириш бўйича халқаро чораларни таклиф қилган.
