Устингга қайноқ сув қуйсам, куясанми? — Жиззахдаги келинга зўравонлик ҳолати юзасидан жиноят иши қўзғатилди
Куйиш жароҳатлари билан шифохонага ётқизилган аёлнинг ҳолати юзасидан суд-тиббий экспертизаси тайинланди.
Жиззах вилоятида келин оилавий зўравонликка учрагани ҳақидаги хабарлар юзасидан жиноят иши қўзғатилди. Бу ҳақда Жиззах вилояти ИИБ ахборот хизмати маълум қилди.
Қайд этилишича, 2026 йил 6 сентябрь куни Шароф Рашидов тумани Қаҳрамон МФЙда яшовчи Ф. М. иссиқ сув сепилиши оқибатида турли даражадаги куйиш жароҳатлари билан Республика шошилинч тиббий ёрдам илмий марказининг Жиззах филиалига ётқизилган.
Тиббий муассаса маълумотномасига кўра, аёлнинг чап қўл елка соҳаси, чап оёқ сон соҳаси, ўнг оёқ тизза бўғими ва қорин қовуқ соҳасида 6–8 фоиз миқдорида 2–3А даражали куйиш жароҳатлари аниқланган.
Ҳолат юзасидан тезкор-тергов гуруҳи тузилиб, воқеа жойи кўздан кечирилган ва ашёвий далиллар процессуал тартибда расмийлаштирилган. Шунингдек, жабрланувчининг тан жароҳатларига ҳуқуқий баҳо бериш учун суд-тиббий экспертизаси тайинланган.
2026 йил 8 сентябрь куни Шароф Рашидов тумани ИИБ ҳузуридаги Тергов бўлими томонидан Жиноят кодексининг 109-моддаси 1-қисми билан жиноят иши қўзғатилган.
Ижтимоий тармоқларда аёл бир неча ой давомида қайнонаси ва қайнопаси томонидан калтаклангани, хонага қамаб қўйилгани ҳамда қайноқ сув қуйилгани ҳақида даъволар тарқалган. Шунингдек, унинг озиқ-овқат ва сувдан маҳрум қилингани, таҳдид қилингани ҳақидаги маълумотлар ҳам эълон қилинган.
ИИБ маълумотига кўра, мазкур хабарларда келтирилган ҳолатлар ҳам тергов доирасида ҳар томонлама ва холисона ўрганилмоқда.
Тергов якунига кўра, ҳолатга қонунчиликда белгиланган тартибда ҳуқуқий баҳо берилади.
