Ҳарбий хизмат олдидан тиббий текширув: наркотик истеъмоли махсус тест орқали аниқланади
Ижобий натижа қайд этилган ёки намуна топширишдан бош тортганлар ҳарбий-тиббий кўрикка қўйилмайди.
Муддатли ҳарбий хизматга чақирилаётган ҳамда контракт бўйича ҳарбий хизматга қабул қилинаётган фуқароларни наркотик воситалари бўйича тиббий текширувдан ўтказиш тартиби белгиланди.
Адлия вазирлиги томонидан мазкур тартибни назарда тутувчи идоравий ҳужжат давлат рўйхатидан ўтказилди.
Унга кўра, тиббий текширув наркотик воситаларини истеъмол қилиш ҳолатларини барвақт аниқлаш мақсадида Республика суд-тиббий экспертиза илмий-амалий маркази ва унинг ҳудудий филиалларида ўтказилади.
Муддатли ҳарбий хизматга чақирилаётган фуқаролар ҳудудий ҳарбий-тиббий комиссияга юборилишидан олдин, контракт бўйича ҳарбий хизматга қабул қилинаётганлар эса ҳарбий-тиббий муассасада тиббий кўрикдан ўтишидан аввал текширувдан ўтказилади.
Текширув икки босқичда амалга оширилади. Дастлаб пешоб намунаси экспресс-тест ёрдамида текширилади. Натижа ижобий бўлган тақдирда пешоб ва/ёки қон намуналарида масс-спектрометрик идентификация текшируви ўтказилади.
Текширув натижаси ижобий чиққан ёки зарур биологик намуналарни топширишдан бош тортган фуқаролар ҳарбий-тиббий кўрикдан ўтказилмайди.
Шунингдек, текширув жараёнида олинган шахсга оид маълумотлар, биологик намуналар ва натижаларнинг махфийлиги таъминланади.
