АҚШ суди янги виза қоидаларини блоклади: журналист ва талабалар учун чекловлар вақтинча тўхтатилди
Таклиф этилган янги тартибга кўра, хорижий талабалар АҚШда тўрт йилгача, журналистлар эса 240 кунгача қолиши мумкин эди.
АҚШ федерал суди хорижий журналистлар, талабалар ва алмашинув дастури иштирокчилари учун таклиф этилган янги виза қоидаларининг кучга киришини вақтинча тўхтатди.
АФП хабарига кўра, АҚШ округ судьяси Деннис Сайлор янги тартиб кучга киришидан бир кун олдин дастлабки буйруқ чиқарган. Шу орқали Ички хавфсизлик департаменти томонидан илгари сурилган ташаббуснинг амал қилиши вақтинча тўхтатилган.
Таклиф этилган қоидаларга кўра, хорижий талабалар учун АҚШда қолиш муддати ўқиш дастурининг давомийлигидан қатъи назар, тўрт йилгача чекланиши кўзда тутилган. Журналистлар учун эса амалдаги беш йиллик муддат 240 кунгача қисқартирилиши, Хитойдан келадиган ОАВ вакиллари учун эса бу муддат 90 кунни ташкил этиши белгиланган.
Мазкур ўзгаришларга қарши университетлар, профессор-ўқитувчилар ҳамда оммавий ахборот воситалари вакилларидан иборат коалиция судга мурожаат қилган.
Судья Деннис Сайлор ўз қарорида янги тартиб расмийлар томонидан суиистеъмол қилиниши эҳтимоли юқори эканини таъкидлаган. Унинг қайд этишича, айниқса, ҳукуматни танқид қилувчи хорижий журналистларнинг визаларини янгиламаслик хавфи мавжуд.
Мазкур иш бўйича навбатдаги суд мажлиси 2 октябрь куни ўтказилиши белгиланган.
