Дам олиш кунлари мажбурий иш: бўлим бошлиғи ходимларни мажбуран ишга жалб қилди
Ҳолат юзасидан мансабдорга нисбатан маъмурий баённома расмийлаштирилиб, жарима солинган.
Сирдарёда ходимларни дам олиш кунлари ишга жалб қилган бўлим бошлиғи жаримага тортилди. Ҳолат Омбудсман ва Давлат меҳнат инспекцияси томонидан ўрганилган.
Омбудсманга “Сирдарё сув таъминоти” АЖнинг Ховос тумани бўлими ходимлари дам олиш ва байрам кунлари мажбуран ишга жалб қилинаётгани ҳақида мурожаат келиб тушган.
Мурожаат Омбудсманнинг Сирдарё вилоятидаги минтақавий вакили ҳамда вилоят Давлат меҳнат инспекцияси томонидан ўрганилган. Текширув давомида ходимларнинг тушунтириш хатлари, Телеграм тармоғидаги видеолар ва уларни ишга чиқишга чақириш билан боғлиқ аудиоёзувлар таҳлил қилинган.
Ўрганиш натижасида ходимларнинг дам олиш кунлари ишга жалб қилингани ўз тасдиғини топган.
Шундан сўнг бўлим бошлиғи А. П. га нисбатан Маъмурий жавобгарлик тўғрисидаги кодекснинг 51-моддаси 1-қисми асосида маъмурий баённома расмийлаштирилган.
Масъулга 41 млн 200 минг сўм миқдорида жарима қўлланган.
