Хоразмда 15 ёшли йигит “Жигули”да ЙПХ ходимлари билан “қувлашмачоқ ўйнади”
ЙПХ ходимларининг тўхташ ишораларига бўйсунмасдан ҳаракатини давом эттирган ҳайдовчи тўхтатилиб, унинг отасига маъмурий баённома расмийлаштирилди.
Хоразмда 15 ёшли ўқувчи «Жигули»ни катта тезликда бошқариб, ЙПХ ходимларининг тўхташ ишорасига бўйсунмади. Ҳолат Урганч шаҳридаги маҳалла ички йўлларидан бирида қайд этилган.
Хоразм вилояти Йўл ҳаракати хавфсизлиги бошқармасининг навбатчилик қисмига маҳалла ички йўлларида VAZ-2107 русумли автомобиль катта тезликда ва шовқин-сурон билан ҳаракатланаётгани ҳақида хабар келиб тушган.
Хабар асосида воқеа жойига етиб борган ЙПХ ходимлари автомобилни тўхтатишга бир неча бор қонуний ишора берган. Бироқ ҳайдовчи талабга бўйсунмай, ҳаракатини давом эттирган.
Ўтказилган тезкор тадбирлар натижасида автомобиль тўхтатилган. Текширув давомида унинг ҳайдовчиси 2011 йилда туғилган, 15 ёшли, Урганч туманидаги 2-сон умумий ўрта таълим мактабининг 9-синф ўқувчиси экани аниқланган.
Вояга етмаган фарзандига автомобиль бошқаришга йўл қўйган отасига нисбатан Маъмурий жавобгарлик тўғрисидаги кодекснинг 135-моддаси 2-қисми асосида маъмурий баённома расмийлаштирилган.
VAZ-2107 русумли автомобиль вақтинча сақлаш учун жарима майдонига жойлаштирилган.
