Президент Шавкат Мирзиёев 46-Бутунжаҳон шахмат олимпиадаси иштирокчиларини табриклади
Президент Ўзбекистон шахматчиларининг халқаро майдондаги ютуқлари ва мамлакатда шахматни ривожлантириш борасидаги ишларни қайд этди.
Ўзбекистон Президенти Шавкат Мирзиёев Самарқандда илк бор ўтказилаётган 46-Бутунжаҳон шахмат олимпиадаси иштирокчиларини мусобақанинг очилиши билан табриклади.
Давлат раҳбари ўз табригида Ўзбекистонда шахмат билан оммавий шуғулланувчилар сони 2 миллион нафардан, рейтингга эга профессионал шахматчилар сони эса 6 минг нафардан зиёдни ташкил этаётганини қайд этди.
Бугунги кунда Ўзбекистонда халқаро гроссмейстер унвонига эга 32 нафар шахматчи бор. Мамлакатнинг беш нафар етакчи шахматчиси жаҳон рейтингининг кучли юзталигидан жой олган.
Ўзбекистон эркаклар терма жамоаси FIDE рейтингида 204 давлат орасида 8-ўринда, аёллар жамоаси эса 20-ўринда қайд этилган.
Шавкат Мирзиёев Ўзбекистон терма жамоасининг 2022 йилда 44-Бутунжаҳон шахмат олимпиадасида ғолиб бўлгани, 2024-йилги Олимпиадада эса совриндорлар сафидан жой олганини таъкидлади.
Табрикда Жавоҳир Синдоровнинг жаҳон чемпионлиги учун даъвогарлар турниридаги ғалабаси ва жаҳон кубогини қўлга киритгани, Нодирбек Абдусатторовнинг блитс бўйича жаҳон чемпионатида кумуш медаль олгани ҳам қайд этилди.
Президент Ўзбекистонда шахматни «оммавийликдан – профессионалликка» тамойили асосида маҳаллалардан бошлаб таълим муассасаларигача ривожлантиришга эътибор қаратилаётганини билдирди.
46-Бутунжаҳон шахмат олимпиадаси илк бор Ўзбекистонда, Самарқанд шаҳрида ўтказилмоқда. Унда дунёнинг 200 дан зиёд мамлакатидан гроссмейстерлар, мураббийлар ва шахмат ихлосмандлари иштирок этмоқда.
Шунингдек, Самарқандда 3-Парашахмат олимпиадаси ва 97-FIDЕ конгресси ҳам ўтказилмоқда.
Шавкат Мирзиёев барча иштирокчиларга мустаҳкам соғлиқ, жамоаларга ютуқ ва омад, FIDE конгресси ишига эса муваффақият тилади.
