Тошкентдаги янги қурилишлар шаҳар инфратузилмасига ортиқча юклама бермаслиги керак — Саида Мирзиёева
Тошкентда янги қурилиш лойиҳаларининг инфратузилмага таъсири, электр ва сув таъминоти ҳамда экологик масалалар муҳокама қилинди.
Тошкент шаҳрининг жадал кенгайиб бораётгани шаҳарсозлик ва экология масалаларига янада чуқурроқ ёндашишни талаб қилмоқда. Шу муносабат билан йирик меъморий лойиҳалар ташаббускорлари, урбанистлар, мустақил мутахассислар, ихтисослашган ижодий студиялар ҳамда олий таълим муассасалари вакиллари билан учрашув ўтказилди.
Саида Мирзиёева учрашувда пойтахтнинг келгуси ривожланишида мавжуд муаммоларни чуқур таҳлил қилиш ва улар бўйича мутахассислар билан биргаликда самарали ечимлар ишлаб чиқиш муҳимлигини таъкидлади.
Хусусан, муҳандислик коммуникациялари ва ижтимоий объектларга тушаётган юкламани камайтириш, электр ва сув таъминоти билан боғлиқ масалаларни ҳал этиш долзарб вазифалар сифатида қайд этилди.
Таъкидланганидек, янги қурилиш лойиҳалари фақат шаҳарнинг иқтисодий ва меъморий ривожига эмас, балки мавжуд инфратузилманинг имкониятларига ҳам мос келиши керак. Бундай лойиҳалар ҳудудларда қўшимча номутаносиблик юзага келтирмаслиги ва шаҳар тизимларига ортиқча юклама туширмаслиги лозим.
Саида Мирзиёева Тошкентни аҳоли ва шаҳар меҳмонлари учун янада қулай, кўркам, озода ва хавфсиз масканга айлантириш йўлида бизнес вакиллари билан ҳамкорликни кучайтириш зарурлигини қайд этди.
Шунингдек, шаҳарнинг барқарор ривожланишига хизмат қиладиган ташаббускор бизнес лойиҳаларини ҳар томонлама қўллаб-қувватлаш Янги Ўзбекистон сиёсатининг муҳим йўналишларидан бири экани таъкидланди.
Учрашувда пойтахтни ривожлантириш бўйича таклиф ва ташаббусларни мутахассислар, бизнес вакиллари ҳамда тегишли соҳа вакиллари билан ҳамкорликда амалга ошириш муҳимлиги қайд этилди.
