Ўзбекистон ва БМТ Туризм: 2027 йил халқаро очилиш маросими Тошкентда ўтказилади
Ўзбекистон ва БМТ барқарор туризмни ривожлантириш бўйича ҳамкорликни кучайтиради.
Бирлашган Араб Амирликларида Ўзбекистон Туризм қўмитаси раиси Абдулазиз Аққулов БМТ Туризм Бош котиби Шайха Носир Ал Новайс билан учрашди.
Мулоқотда Ўзбекистон ва БМТ Туризм ўртасидаги стратегик ҳамкорликни ривожлантириш, барқарор туризм тамойилларини илгари суриш, туристик йўналишлар рақобатбардошлигини ошириш ҳамда инсон капиталини ривожлантириш масалалари муҳокама қилинди.
Учрашувнинг асосий мавзуларидан бири “2027 йил — Барқарор ва яшовчан туризм халқаро йили”нинг расмий очилиш маросимига тайёргарлик бўлди. Тадбирни 2026 йил ноябрь ойида Тошкент шаҳрида “Ипак йўлида туризм” Тошкент халқаро туризм ярмаркаси доирасида ўтказиш режалаштирилган.
Мазкур ташаббус Президент Шавкат Мирзиёев томонидан 2026 йил 1 апрель куни БМТ Туризм раҳбарияти билан учрашувда илгари сурилган эди.
Музокаралар якунида халқаро йилнинг расмий очилиш маросимини Тошкентда ўтказиш бўйича Битим имзоланди. Ҳужжат тадбирга тайёргарлик кўриш ва икки томон томонидан амалга ошириладиган ишларни мувофиқлаштириш учун зарур ҳуқуқий ва ташкилий асосни яратади.
Шунингдек, БМТ Туризм Бош котиби Ўзбекистон Президенти томонидан илгари сурилган Хавфсиз туризм кодексини ишлаб чиқиш жараёни шахсий назоратида эканини маълум қилди. Ушбу йўналишда давлатлар ва халқаро экспертлар билан ҳамкорликни жадаллаштириш бўйича ишлар олиб борилмоқда.
Тошкентда мазкур халқаро тадбирнинг ўтказилиши Ўзбекистоннинг глобал туризм кун тартибидаги иштирокини янада кучайтириши ҳамда барқарор ва яшовчан туризмни ривожлантириш бўйича халқаро ҳамкорлик учун муҳим платформа бўлиб хизмат қилиши кутилмоқда.
