“Амир Темур хиёбони” метро бекатидаги нохуш ҳидга нима сабаб бўлди? Метрополитен изоҳ берди
“Тошкент метрополитени” шаҳар ҳокимлиги ва оқова сув тармоқлари бошқармасига мурожаат қилди.
Ижтимоий тармоқларда “Амир Темур хиёбони” метро бекати ҳудудидан нохуш ҳид келаётгани ҳақида хабарлар тарқалди.
Мазкур ҳолат юзасидан “Тошкент метрополитени” АЖ изоҳ берди.
Аниқланишича, нохуш ҳидга Мустақиллик шоҳ кўчасида жойлашган шаҳар оқова сув тармоғидаги носозлик сабаб бўлган.
Хусусан, оқова сув тармоғидаги носозлик оқибатида сизиб чиққан сув метро туннелининг бетон конструкцияси орқали унинг ички қисмига кирган. Натижада бекат ҳудудида нохуш ҳид юзага келган.
Мазкур ҳолат бўйича “Тошкент метрополитени” АЖ Тошкент шаҳар ҳокимлиги ҳамда шаҳар оқова сув тармоқлари бошқармасига расмий мурожаат йўллаган.
Мурожаатда аниқланган носозликни зудлик билан бартараф этиш ва тегишли чораларни кўриш сўралган.
Шунингдек, йўловчилар учун қулай ва хавфсиз шароитларни таъминлаш мақсадида ҳолат “Тошкент метрополитени” АЖ томонидан назоратга олинган.
