Андижонда кредит қарзи сабаб МЧЖ биноси олиб қўйилди

Тадбиркорлик фаолиятини ривожлантириш мақсадида тижорат банкларидан олинган кредитлар ўз вақтида тўланмаган ҳолларда, қарздорликни қоплаш учун гаровга қўйилган мулкка нисбатан мажбурий чоралар қўлланилади.

 

 Мажбурий ижро бюроси Андижон вилояти бошқармаси иш юритувида бўлган суд ҳужжатларига мувофиқ, қарздор масъулияти чекланган жамият ҳисобидан ундирувчи “Асакабанк” АЖ фойдасига жами 1,8 миллиард сўм миқдоридаги кредит қарзи ундирилиши белгиланган.

 

 Суд ҳужжатига асосан ундирувни гаровдаги жавобгарга тегишли бўлган дори воситаларини ишлаб чиқариш бино ва иншоотларига қаратиш белгиланган.

 

 Бюронинг вилоят бошқармаси ходимлари томонидан ижро ҳаракатлари амалга оширилиб, қарздорга суд ҳужжатида белгиланган мажбуриятларни ихтиёрий равишда бажариши учун имконият берилган бўлса-да, қарздорлик белгиланган муддатда бартараф этилмаган.

 

 Ижро жараёни давомида бошланғич баҳоси 2,5 миллиард сўм бўлган ишлаб чиқариш биноси хатланди.

 

 Ҳозирда хатланган мол-мулкларни электрон онлайн-аукцион савдосига чиқариш чоралари кўрилмоқда.

 

 Таъкидлаш жоизки, кредит маблағларидан фойдаланган ҳар бир қарздор ўз мажбуриятларини белгиланган муддатларда бажариши лозим. Қарздорлик ихтиёрий равишда бартараф этилмаган тақдирда, суд ҳужжати асосида мол-мулкни хатлаш, ундирувга қаратиш ва қонунда белгиланган бошқа мажбурий ижро чоралари қўлланилиши мумкин.