“Бизга нима кераги бор?” — Алишер Қодиров эски бинолар ҳақида гапирди
“Миллий тикланиш” партияси раҳбари Тошкент марказидаги айрим эски биноларни сақлаш масаласида барча объектларга бир хил ёндашув бўлмаслиги кераклигини айтди.
“Миллий тикланиш” демократик партияси етакчиси Алишер Қодиров Маданий мерос агентлиги фаолияти ва Тошкентдаги айрим эски биноларни маданий мерос сифатида сақлаш масаласига муносабат билдирди.
Қодировнинг таъкидлашича, маданий мерос объектларига нисбатан табақалаштирилган ёндашув қўлланиши, давлат маблағлари эса аввало миллий маданият ва тарихий аҳамиятга эга объектларни асрашга йўналтирилиши керак.
У Тошкент марказидаги айрим эски биноларни мисол қилиб, уларнинг жамият ва миллий маданият учун аҳамиятини қайта кўриб чиқиш зарурлигини айтди.
“Бизга нима кераги бор унинг? Унинг бизга қанақа қадрияти бор маданий мерос сифатида?” — дея савол қўйди Қодиров.
Сиёсатчи айрим объектларнинг аҳамиятини Самарқанддаги Шоҳи Зинда каби тарихий ёдгорликлар билан таққослаб, барча маданий мерос объектларига бир хил ресурс ажратиш мақсадга мувофиқ эмаслигини билдирди.
Қодиров Маданий мерос агентлигига ажратиладиган маблағлар, аввало, миллий маданиятни асраш ва муҳофаза қилишга хизмат қилиши кераклигини таъкидлади.
