Бухородаги рейдда 211 та жаримаси бор машина топилди
Ҳайдовчининг 137 млн сўмлик маъмурий жаримаси бўлган.
Мажбурий ижро бюроси Бухоро вилояти бошқармаси қидирув шўъбаси ҳамда вилоят ИИБ ЙҲХБ ходимлари билан ҳамкорликда махсус рейд тадбирлари ўтказилмоқда.
Тадбирлар давомида 2,6 млрд сўмлик 114 та ижро ҳужжатлари бўйича қарздорлар номидаги 98 та автотранспорт воситалари жарима майдончаларига жойлаштирилиб, 70 та 741 млн сўмлик ижро ҳужжатлар ижроси амалда таъминланди.
Маъмурий жарималарни ундириш тўғрисидаги ижро ҳужжатлар таҳлил қилиниб, маҳалла кесимида манзилли ишлар олиб борилмоқда.
Мисол учун, Ромитан туманида яшовчи фуқаро ўзига тегишли “TRACKER 2” автотранспорт воситасини йўл ҳаракати қоидаларига риоя қилинмасдан бошқариши оқибатида 211 та 137 млн сўмлик маъмурий жарима қўлланилган.
Қидирув тадбирлари давомида қидирувдаги автомашина топилиб, вақтинча сақлаш учун жарима майдончасига жойлаштирилган. Ҳозирда, қарздорларга тегишли бўлган қидирувдаги автотранспорт воситаларини аниқлаш борасидаги рейд тадбирлари давом этмоқда.
