Эрон уруши АҚШга қимматга тушмоқда: харажатлар 38 млрд долларга етди
Уруш давом этса, ойига яна 3 млрд долларгача маблағ сарфланиши мумкин.
АҚШнинг Эронга қарши ҳарбий операциялари 1 августгача мамлакатга 38 млрд долларга тушган. Уруш давом этадиган бўлса, харажатлар ойига яна 2–3 млрд долларга ошиши мумкин. Бу ҳақда Reuters АҚШ Конгрессининг Бюджет идораси (СBО) ҳисоботига таяниб хабар берди.
СBО ҳисоб-китобларига кўра, харажатларнинг асосий қисми ўқ-дорилар ва ҳаво мудофааси тизимлари учун тутувчи ракеталарни харид қилиш ҳамда ишлаб чиқаришга тўғри келган. АҚШ ўқ-дорилар захирасини тўлиқ тиклаш учун беш йилгача вақт талаб қилиниши мумкин.
Ҳисоботда, шунингдек, ҳарбий операциялар АҚШ иқтисодиётига таъсир кўрсатиши қайд этилган. СBО прогнозига кўра, уруш 2027 йилнинг дастлабки уч ойида инфляцияни 0,5 фоиз пунктга ошириши мумкин.
СBО маълумотларига кўра, ҳисоб-китоблар АҚШ Мудофаа вазирлигининг ҳамкорлигисиз тайёрланган. Reuters хабарида Пентагон СBО аудиторлари билан ҳисоботни тайёрлаш жараёнида ҳамкорлик қилмагани қайд этилган.
Шу билан бирга, СBО ҳисоб-китоблари 1 августгача бўлган харажатларни қамраб олади. Уруш давом этиши билан умумий харажатлар янада ошиши кутилмоқда.
