Лицензиясиз “Умра” хизматлари: Тошкент ва Фарғонада икки ҳолат аниқланди
Тошкент вилоятида фуқаро 1 минг АҚШ доллари ва 1,2 млн сўм олаётган вақтда, Фарғонада эса турфирма менежери 2 200 АҚШ доллари олаётган пайтда қўлга олинган.
Тошкент ва Фарғона вилоятларида фуқароларни «Умра» зиёратига юборишни ваъда қилиб, улардан пул олган шахсларнинг ноқонуний фаолиятига чек қўйилди. Бу ҳақда ДХХ хабар берди.
Биринчи ҳолат Тошкент вилоятининг Тошкент туманида аниқланган. 1984 йилда туғилган фуқаро тегишли лицензияга эга бўлмаган ҳолда пойтахтда яшовчи фуқаронинг ишончига кириб, танишлари орқали уни Саудия Арабистонига «Умра» зиёратига юборишни ваъда қилган.
Бунинг эвазига у 1 100 АҚШ доллари талаб қилган. Фуқаро берган 1 минг АҚШ доллари ва 1,2 млн сўмни олаётган вақтда у ДХХ, ИЖҚКД ва ИИВ ходимлари томонидан ашёвий далиллар билан ушланган.
Шунга ўхшаш ҳолат Фарғона вилоятининг Данғара туманида ҳам қайд этилган. ДХХ ва ИИБ ходимлари ҳамкорлигида ўтказилган тезкор тадбир давомида туристик фирма менежери Учкўприк туманида яшовчи икки нафар фуқарони «Умра» сафарига юбориш эвазига 2 200 АҚШ доллари олаётган вақтида ушланган.
Мазкур ҳолатлар юзасидан қонунбузарларга нисбатан жиноят ишлари қўзғатилган. Ҳозирда тергов ҳаракатлари олиб борилмоқда.
