“Сабабини тушунтирмади, ҳужжат кўрсатмади”: Сирдарёдаги ИИБ ходимлари жазоланди
Фуқарони ўз уйидан сабабсиз олиб кетишга уринган ИИБнинг айрим ходимларига нисбатан хизмат текшируви тайинланди.
Олий Мажлиснинг Инсон ҳуқуқлари бўйича вакилига (Омбудсман) Сирдарё вилоятидан фуқаро Д. А. мурожаат қилиб, ички ишлар органлари ходимларининг хатти-ҳаракатларидан норозилигини билдирган. Бу ҳақда Омбудсман матбуот хизмати хабар берди.
Мурожаатда қайд этилишича, Ховос туманидаги хонадонлардан бирига профилактика инспектори бошчилигида ички ишлар органлари ходимлари келиб, мурожаатчининг турмуш ўртоғини олиб кетишга уринган. Фуқаронинг билдиришича, ходимлар бу ҳаракат сабабини тушунтирмаган ва тегишли ҳужжатларни кўрсатмаган.
Мурожаат Омбудсман назоратига олинган. Ҳолат Омбудсманнинг Сирдарё вилоятидаги минтақавий вакили томонидан ўрганилиб, ИИБ ходимларининг ҳаракатларига ҳуқуқий баҳо бериш учун Сирдарё вилояти Ички ишлар бошқармасига назорат хати юборилган.
Шундан сўнг Ховос тумани ИИБнинг айрим ходимларига нисбатан хизмат текшируви тайинланган.
Текширув якунига кўра, хизмат фаолиятида аниқланган камчиликлар сабаб 4 нафар ходимга «ҳайфсан» ва «танбеҳ» интизомий жазо чоралари қўлланилган.
Шунингдек, яна бир ходимнинг хатти-ҳаракатларига якуний баҳо бериш масаласи Интизомий кенгашга ҳавола этилган.
