Тунги “операция” омадсиз тугади: Сирдарёда 17 ёшли йигит ушланди
Болта билан банкоматни бузишга уринган ўсмир ташвиш сигнали туфайли қўлга тушди.
Сирдарё вилояти Гулистон туманида тунги вақтда банкоматни бузиб, ундаги пулларни ўғирлашга уринган ўсмир Қўриқлаш хизмати ходимлари томонидан қўлга олинди. Бу ҳақда Сирдарё вилояти Ички ишлар бошқармаси хабар берди.
Воқеа 12 сентябрь куни соат 03:16 ларда Гулистон туманидаги «Олтин водий» МФЙ, Комилий кўчасида содир бўлган.
Мазкур ҳудуддаги «Инкассация хизмати» МЧЖга қарашли банкоматдан Сирдарё вилояти ИИБ ҳузуридаги Қўриқлаш хизмати мониторинг марказига ташвиш сигнали келиб тушган.
Воқеа жойига етиб борган ходимлар банкомат олдида юзини яширган, қўлида болта ва бошқа ашёлар билан унинг ташқи қисмини бузишга уринаётган шахсни аниқлаган.
Қўриқлаш хизмати ходимларини кўрган гумонланувчи воқеа жойидан қочишга уринган. Бироқ тезкор гуруҳ ходимлари томонидан у қўлга олинган.
Суриштирув давомида қўлга олинган шахс Гулистон туманида яшовчи, 2008 йилда туғилган Д. С. экани аниқланган. У белгиланган тартибда туман Ички ишлар бўлимига олиб борилган.
Ҳозирда мазкур ҳолат юзасидан тергов-суриштирув ишлари олиб борилмоқда.
