13 ёшгача — тақиқ, 15 ёшгача — чеклов: Европада ижтимоий тармоқларга янги талаблар

Европа Иттифоқида болаларнинг ижтимоий тармоқлардан фойдаланишига ёш бўйича янги чекловлар жорий этилиши таклиф қилинмоқда. Еврокомиссия президенти Урсула фон дер Ляйен 16 сентябрь куни Европарламентдаги нутқида “EU Kids Act” ташаббусини тақдим этиш режалаштирилганини маълум қилди.

 

Таклифга кўра:

• 13 ёшгача бўлган болалар ижтимоий тармоқлардан фойдалана олмайди;

• 15 ёшгача шахсий аккаунт очишга рухсат берилмайди;

• 13–15 ёшдагилар ота-она ёки васий томонидан яратиладиган ва назорат қилинадиган чекланган функцияли «мини-аккаунт»лардан фойдаланиши мумкин;

• бундай аккаунтларда фойдаланиш вақти кунига бир соатгача чекланиши кўзда тутилмоқда;

• 15–18 ёшдагилар учун платформаларда болалар хавфсизлигини ҳисобга олувчи “safe design” талаблари жорий этилиши режалаштирилмоқда.

Фон дер Ляйеннинг таъкидлашича, янги ёндашувда платформалардан вояга етмаганлар учун хизматлари хавфсизлигини ўзлари исботлаши талаб қилинади. Унинг фикрича, масала фақат болаларнинг ижтимоий тармоқларга киришида эмас, балки платформаларнинг болалар ҳаётига қачон ва қандай кириб келишидадир.

Еврокомиссия раҳбари, шунингдек, болаларни қарамликка олиб келувчи функциялар, тобора экстремал контентга йўналтириш ва қизларнинг суратларидан сунъий интеллект ёрдамида жинсийлаштирилган сохта тасвирлар яратиш каби хавфлардан ҳимоя қилиш зарурлигини таъкидлади.

Еврокомиссия маълумотига кўра, “EU Kids Act” бўйича қонунчилик таклифи 17 сентябрь куни тақдим этилиши режалаштирилган. Шу сабабли ҳозирги босқичда юқоридаги қоидалар Европа Иттифоқида амалда кучга кирган тақиқ эмас, балки таклиф қилинаётган янги тартиб ҳисобланади.

Янги ташаббус Европа Иттифоқининг барча аъзо давлатлари учун ягона ёндашувни шакллантиришни кўзда тутади. Айрим Европа давлатлари эса вояга етмаганларнинг ижтимоий тармоқлардан фойдаланишига миллий даражада аллақачон турли чекловларни жорий қилган.