5700 доллар ортидан қотиллик: мижозни ўлдирган банк ходими 18 йилга қамалди
Фарғонада банк ходими автомобиль тўлови учун 5700 доллар олиб келган мижозини овлоқ жойга олиб бориб, қасддан ўлдирган.
Фарғона вилояти Қўқон шаҳрида мижозининг автомобиль тўлови учун олиб келган 5700 АҚШ долларини эгаллаш мақсадида уни ўлдирган банк ходимига нисбатан суд ҳукми ўқилди.
Маълум бўлишича, Қўқон шаҳридаги банклардан бирида ишлаган ходим мижознинг ёнида автомобиль учун 5700 доллар борлигини билиб, ушбу маблағни эгаллаш режасини тузган.
У мижознинг ишончига кириб, турли баҳоналар билан уни кўчага чиқишга кўндирган ва ўзининг Тrakcer русумли автомобилида овлоқ жойга олиб борган.
У ерда улар ўртасида атайлаб жанжал чиқарган. Мижоз қаршилик кўрсатганидан сўнг банк ходими ўзи билан олиб юрган пичоқ ёрдамида унга кўплаб жароҳатлар етказиб, қасддан ўлдирган.
Шундан сўнг жиноят изларини яшириш мақсадида марҳумнинг жасадини автомобилига солиб, банкка қайтган. Иш вақти тугагач эса жасадни Катта Фарғона каналига ташлаб юборган.
Марҳумни қидириш ишлари олти кун давом этган. Қидирув тадбирларига Фавқулодда вазиятлар вазирлигининг Фарғона вилояти бошқармаси ходимлари ҳам жалб этилган. Жараёнда маҳаллий аҳоли вакиллари ҳам иштирок этган. Олти кунлик қидирувлардан сўнг марҳумнинг жасади каналдан топилган.
Марҳумнинг онаси ўғлининг автомобиль олиш учун уйидан хурсанд бўлиб чиқиб кетганини айтган.
Мазкур жиноят иши Қўқон шаҳар жиноят ишлари бўйича судида кўриб чиқилган.
Судланувчи Жиноят кодексининг 97-моддаси 2-қисми «ж» ва «и» бандлари билан айбли деб топилган.
Унга 18 йил муддатга озодликдан маҳрум қилиш жазоси тайинланган.
Шунингдек, суд ҳукмига кўра, марҳумнинг қонуний вакилига етказилган моддий ва маънавий зарар ундирилиши белгиланган.
