Президентга яна виза берилмади: АҚШ Фаластин расмийларига чекловни узайтирди
Фаластин президенти Маҳмуд Аббос кетма-кет иккинчи йил БМТ Бош Ассамблеясидаги йиғилишларда шахсан иштирок эта олмайди.
АҚШ Давлат департаменти Фаластин маъмурияти расмийлари ва Фаластинни озод қилиш ташкилоти аъзоларига нисбатан виза чекловларини узайтирди. Қарор БМТ Бош Ассамблеясининг навбатдаги сессияси арафасида эълон қилинган.
Чекловлар сабаб Фаластин президенти Маҳмуд Аббос ҳам Нью-Йоркка бора олмайди. У ўтган йили ҳам АҚШ визасини ололмагани сабабли БМТ Бош Ассамблеясидаги нутқини видеомурожаат орқали йўллаган эди.
АҚШ Давлат департаменти қарорни Фаластин маъмурияти ва Фаластинни озод қилиш ташкилотининг Вашингтон билан боғлиқ мажбуриятларини бажармагани ҳамда тинчлик истиқболларига путур етказаётган фаолияти билан изоҳлаган.
АҚШ томони Фаластин маъмуриятини Исроил-Фаластин можаросини халқаро судлар, жумладан, Халқаро жиноий суд ва Халқаро суд орқали халқаро майдонга олиб чиқишга уринишда, Фаластин давлатини тўғридан тўғри музокараларсиз халқаро миқёсда тан олдиришга интилишда айблаган. Давлат департаменти, шунингдек, Фаластин маъмуриятининг ҳужумларда судланган шахслар ва уларнинг оилаларига тўловлар амалга ошириши ҳақидаги позициясини ҳам келтирган.
Шу билан бирга, Фаластиннинг БМТдаги доимий кузатувчи миссияси ходимлари учун мавжуд виза имтиёзи сақлаб қолинади. Бу уларга БМТдаги фаолиятини давом эттириш имконини беради.
АҚШнинг мазкур қарори БМТ Бош Ассамблеясининг навбатдаги сессияси бошланиши олдидан қабул қилинди. Сессия давомида Фаластин масаласи, жумладан, давлат сифатида халқаро тан олиниши ва Ғазо ҳудудидаги вазият муҳокама қилиниши кутилмоқда.
