Россиядан 30, Қозоғистондан 2 нафар бола: Ватанга қайтариш ишлари давом этмоқда

2026 йил 15 сентябрь куни Россия Федерациясидан ота-она қарамоғисиз қолган вояга етмаганларни Ватанга қайтариш бўйича хизмат сафарининг учинчи гуруҳи Ўзбекистонга етиб келди.

Ўзбекистоннинг Россиядаги консуллик муассасалари кўмагида навбатдаги гуруҳ таркибида 7 нафар вояга етмаган бола Ватанга қайтарилди. Уларнинг 3 нафари жазони ижро этиш муассасаларида жазо муддатини ўтаётган оналари томонидан Ўзбекистон вакилларига топширилган.

Вояга етмаганларни Ватанга қайтариш ишлари Ички ишлар вазирлиги, Соғлиқни сақлаш вазирлиги ҳамда Президент ҳузуридаги Ижтимоий ҳимоя миллий агентлиги ходимларидан иборат ишчи гуруҳ томонидан амалга оширилди. Жараёнда Болалар омбудсмани ҳамда Ўзбекистоннинг Россиядаги консуллик муассасалари кўмак кўрсатди.

Мазкур гуруҳнинг қайтиши билан Россияга амалга оширилган хизмат сафари якунланди. Сафар давомида жами 30 нафар вояга етмаган бола Россиядан Ўзбекистонга қайтарилган. Шунингдек, тегишли ишлар натижасида Қозоғистондан 2 нафар бола Ватанга олиб келинган.

Шу тариқа, амалга оширилган тадбирлар доирасида жами 32 нафар вояга етмаган боланинг Ўзбекистонга қайтарилиши таъминланган.

Ватанга қайтарилган болаларнинг ҳуқуқ ва қонуний манфаатларини таъминлаш, уларни оилавий муҳитга қайтариш, зарур ҳолларда муқобил жойлаштириш шаклларига жойлаштириш ҳамда уларга ижтимоий, тиббий, психологик ва бошқа хизматларни кўрсатиш бўйича чоралар кўрилмоқда.

Болаларнинг кейинги ҳолати ва оилага мослашуви яшаш манзили бўйича «Инсон» ижтимоий хизматлар марказлари томонидан ижтимоий ҳамроҳлик асосида кузатиб борилади.

Хорижда ота-она қарамоғисиз қолган вояга етмаганларни Ватанга қайтариш ишлари давом эттирилмоқда. Хусусан, Грузияда ота-она қарамоғисиз қолган 1 нафар болани Ўзбекистонга қайтариш мақсадида хизмат сафари амалга оширилиши кутилмоқда.

Шунингдек, Туркия билан вояга етмаганларни Ватанга қайтариш масалалари юзасидан музокаралар олиб борилмоқда.