Тошкентга кўпроқ яшил масканлар керак — Саида Мирзиёева
Шайхонтоҳур туманида барпо этилиши режалаштирилган янги истироҳат боғи ҳудудида кўл, кўкаламзор майдонлар ва дам олиш учун зарур шароитлар яратилади.
Тошкент шаҳрида яшил ҳудудларни кўпайтириш ва аҳоли учун қулай жамоат маконларини яратиш масалаларига эътибор қаратилмоқда.
Саида Мирзиёева Шайхонтоҳур туманида барпо этилиши режалаштирилган янги истироҳат боғи ҳудудини кўздан кечирди.
Таъкидланишича, пойтахтнинг иссиқ иқлими шароитида дарахтлар, сув ҳавзалари ва соя-салқин жойларнинг кўпайтирилиши аҳолининг турмуш сифатига бевосита таъсир қилади.
Янги истироҳат боғи ҳудудида кўл ва кўкаламзор майдонлар ташкил этилиши режалаштирилган. Шунингдек, бу ерда оилавий дам олиш, болалар билан сайр қилиш ва спорт билан шуғулланиш учун зарур шароитлар яратилади.
Саида Мирзиёева бундай масканларни Тошкентнинг барча туманларида ташкил этиш лозимлигини таъкидлади.
Шунингдек, мавжуд яшил ҳудудларни асраб-авайлаш, истироҳат боғларини кўпайтириш ва янги экологик тоза мавзеларни барпо этиш зарурлиги қайд этилди.
Тошкентни ривожлантиришнинг муҳим йўналишларидан бири шаҳар муҳитини янада яшил ва қулай қилишдир. Бу борадаги бошланган ишларни изчил давом эттириш мақсад қилинган.
