“Туркий дунё маданиятига қўшган ҳиссаси учун”: Озодбек Назарбеков халқаро мукофотга лойиқ кўрилди
Тақдирлаш маросими 26 сентябрь куни Туркиянинг Анталия шаҳрида бўлиб ўтади.
Ўзбекистон маданият вазири Озодбек Назарбеков Туркиянинг “Tiyatro Gazetesi” нашри томонидан ташкил этиладиган Халқаро Ўрта ер денгизи театр мукофотининг “Туркий дунё маданиятига қўшган ҳиссаси учун” номинациясида халқаро мукофотга лойиқ кўрилди.
Ўзбекистон Маданият вазирлиги матбуот хизматининг маълум қилишича, “Tiyatro Gazetesi” ўтган йилдан бошлаб Анталия шаҳрининг маданият ва санъат соҳасидаги нуфузини ошириш ҳамда театр санъати фидойиларининг фаолиятини халқаро миқёсда эътироф этиш мақсадида Халқаро Ўрта ер денгизи театр мукофотларини топшириш маросимини йўлга қўйган.
Тадбир доирасида Ўрта ер денгизи минтақаси ҳамда хорижий давлатлардан танлаб олинган номзодларга турли номинациялар бўйича мукофотлар топширилади.
Ташкилий қўмита қарорига кўра, бу йил Ўзбекистон Республикаси маданият вазири Озодбек Назарбеков ҳам “Туркий дунё маданиятига қўшган ҳиссаси учун” номинацияси бўйича мукофот билан тақдирланади. Бу ҳақдаги хабар “Tiyatro Gazetesi”нинг ижтимоий тармоқлардаги саҳифаларида эълон қилинган.
Ташкилотчилар сўнгги йилларда Ўзбекистонда театр санъатига қаратилаётган эътибор ва соҳани қўллаб-қувватлаш борасидаги ишларни алоҳида қайд этган. Хусусан, хорижий режиссёрларнинг Ўзбекистонга таклиф этилиши ҳамда мамлакатнинг халқаро театр фестивалларидаги фаол иштироки эътироф этилган.
Шунингдек, ижодий фаолиятни қўллаб-қувватлаш ва театр санъатини ривожлантиришга қаратилаётган эътибор соҳанинг оммалашувида муҳим аҳамият касб этаётгани таъкидланган.
