3472 сўмгача: Тошкент вилоятида ичимлик суви ва оқова сув тарифлари оширилади

Тошкент вилоятида ичимлик суви таъминоти ва оқова сув хизматлари учун янги тарифлар тасдиқланди. Улар 2026 йил 3 октябрдан кучга киради.

Халқ депутатлари Тошкент вилояти Кенгашининг 16 сентябрдаги қарорига кўра, «Тошкент вилояти сув таъминоти» АЖ хизматлари учун 1 куб метр ичимлик сувининг ҚҚСсиз тарифи аҳоли учун 3100 сўм, бюджет ташкилотлари ва улгуржи истеъмолчилар учун 16 минг сўм этиб белгиланган.

ҚҚС билан ҳисоблаганда янги тарифлар қуйидагича бўлади:

аҳоли учун ичимлик суви — 3472 сўм;

бюджет ташкилотлари ва улгуржи истеъмолчилар учун — 17 920 сўм.

Оқова сув хизматининг ҚҚСсиз тарифи эса:

аҳоли учун — 1680 сўм;

бюджет ташкилотлари ва улгуржи истеъмолчилар учун — 4480 сўм этиб белгиланган.

Аввалги тарифларда аҳоли учун 1 куб метр ичимлик суви 2600 сўм, оқова сув хизмати эса 1300 сўм эди. Бюджет ташкилотлари ва улгуржи истеъмолчилар учун мазкур тарифлар мос равишда 15 минг ва 3000 сўмни ташкил этган.

Таъкидланишича, тарифларни қайта кўриб чиқишда сув таъминоти тизимини таъмирлаш ва модернизация қилиш, электр энергияси, иш ҳақи, солиқлар ҳамда хорижий кредитлар бўйича харажатлар инобатга олинган.

Вилоятда марказлашган ичимлик суви билан таъминланганлик даражасини келгуси беш йилда 82 фоиздан 95 фоизга, канализация қамровини эса 23 фоиздан 45 фоизга етказиш режалаштирилган. Бунинг учун янги сув ва канализация тармоқлари ҳамда тегишли иншоотларни барпо этиш кўзда тутилган.

Шунингдек, ҳисоблагичлар мавжуд бўлмаган ҳолатларда совуқ сув хизмати учун тўловларга 1,5 баравар оширувчи коэффициент қўлланади.

Истеъмолчилар 3 октябргача икки ойлик тўловни олдиндан эски тарифлар бўйича амалга оширишлари мумкин.