Ҳайдовчилар маоши бўйича эътирозлар: “Тошшаҳартрансхизмат” махсус ишчи гуруҳ тузди
Ижтимоий тармоқларда автобус ҳайдовчиларининг маоши кечикаётгани ва тўловлардаги ноаниқликлар юзасидан эътирозлари акс этган видеолар тарқалди.
Ижтимоий тармоқларда автобус ҳайдовчиларининг ойлик маоши кечикаётгани ва тўловлардаги ноаниқликлар юзасидан эътирозлари акс этган видеолар тарқалди. «Тошшаҳартрансхизмат» ҳолат юзасидан изоҳ бериб, мурожаатларни ўрганиш учун махсус ишчи гуруҳ тузилганини маълум қилди.
Жамият маълумотига кўра, «Тошшаҳартрансхизмат» таркибидаги саккизта автобус саройида фаолият юритувчи ҳайдовчиларнинг маоши ишланган ой якунланганидан сўнг ҳисобланади.
Бунда кейинги ойнинг 1-санасидан 10-санасигача ҳайдовчининг бир ой давомида ишлаган соатлари, бажарган қатновлари сони ва мунтазамлиги текширилади. Шунингдек, унинг йўналишда ҳаракатланган вақтида содир этган қоидабузарликлари ҳам ўрганилади.
Барча маълумотлар йиғилгач, кейинги ойнинг 10-санасидан ҳайдовчининг маоши бўйича аниқ ҳисоб-китоб чиқарилади. Шундан сўнг белгиланган маош тўланади.
«Тошшаҳартрансхизмат» август ойи учун ҳисобланган маошлар барча ҳайдовчиларга 15 cентябрдан бошлаб тўлана бошланганини билдирган.
Видеомурожаатларда билдирилган эътирозларни текшириш учун жамият масъул ходимларидан иборат махсус ишчи гуруҳ ҳам тузилган. Ҳайдовчиларнинг мурожаатлари бирма-бир ўрганилиб, камчиликлар аниқланган тақдирда масъулларга нисбатан белгиланган тартибда чора кўрилиши айтилган.
Текширув якунлари бўйича қўшимча маълумот берилади.
