Қарздорлик эвазига пора: Оҳангаронда МЧЖ раҳбари ушланди
Бош пудратчи асфальтлаштириш объектини ёрдамчи пудратчига бириктириб бериш ҳамда 1,2 млрд сўмлик қолган тўловни амалга ошириш эвазига 83,5 минг доллар талаб қилинган.
Тошкент вилоятининг Оҳангарон туманида фаолияти йўлга қўйилаётган паррандачилик фабрикаси қурилиши билан боғлиқ ноқонуний ҳолат аниқланди. Бу ҳақда ДХХ хабар берди.
Маълум қилинишича, мазкур объектнинг бош пудратчиси ҳисобланган МЧЖ раҳбари ички йўлларни асфальтлаш ишларини бажариш учун бошқа бир МЧЖни ёрдамчи пудратчи сифатида жалб қилган. Томонлар жорий йилнинг апрель ойида ушбу ишлар бўйича 3,7 млрд сўмлик шартнома тузган.
Шартномага мувофиқ ишлар бажарилган ва бош пудратчи келишилган маблағнинг 2,5 млрд сўмини ёрдамчи пудратчининг ҳисоб рақамига ўтказган. Бироқ қолган 1,2 млрд сўмни тўлашни пайсалга солиб келган.
Шундан сўнг, бош пудратчи ёрдамчи пудратчига асфальтлаштириш объектини бириктириб бергани ҳамда қолган 1,2 млрд сўмни тўлаб бериши эвазига унинг таъсисчисидан 83,5 минг АҚШ доллари талаб қилган.
ДХХ Тошкент вилояти бўйича бошқармаси ҳамда Иқтисодий жиноятларга қарши курашиш департаменти ходимлари томонидан ўтказилган тезкор тадбирда МЧЖ раҳбари талаб қилинган пул маблағини олаётган вақтида ашёвий далиллар билан ушланди.
Ҳолат юзасидан унга нисбатан жиноят иши қўзғатилган. Ҳозирда тергов ҳаракатлари олиб борилмоқда.
