Чиқиндидан электр: Жиззахда кунига 1 000 тонна чиқинди қайта ишланади

Жиззах ва Сирдарё вилоятларида қаттиқ маиший чиқиндиларни термик усулда қайта ишлаш орқали электр энергияси ишлаб чиқариш лойиҳаси амалга оширилади.

Президентнинг 17 сентябрдаги қарорига кўра, Жиззах вилоятидаги лойиҳа учун 2026–2028 йилларда 130 млн доллар тўғридан-тўғри хорижий инвестиция жалб қилинади.

Лойиҳа Хитойнинг China Civil Engineering Construction Corporation (CCECC) ва Cevia Enviro Inc. (Henan Investment Group) компаниялари консорциуми томонидан амалга оширилади. Инвестор ва Ўзбекистон ҳукумати номидан Инвестициялар, саноат ва савдо вазирлиги ўртасида 14 сентябрь куни инвестиция шартномаси имзоланган.

Қарорга мувофиқ, Жиззах вилоятида кунига 1 000 тонна қаттиқ маиший чиқиндини термик усулда қайта ишлаш ҳамда бунинг натижасида йилига 110 млн кВт·соат электр энергияси ишлаб чиқариш қувватига эга ускуналар ишга туширилади.

Лойиҳа учун Жиззах вилояти ҳокимлигига Шароф Рашидов туманидаги “Ғозғонтепа” МФЙ ҳудудидан 10,8 гектар ер ажратилади.

Ишлаб чиқариладиган электр энергиясини “Ўзэнергосотиш” АЖ 30 йил давомида кафолатланган тарзда сотиб олиши белгиланган. Шу билан бирга, Чиқиндиларни бошқариш ва циркуляр иқтисодиётни ривожлантириш агентлиги лойиҳа компаниясини мазкур муддат давомида белгиланган ҳажмдаги қаттиқ маиший чиқиндилар билан таъминлаб боради.

Лойиҳа компанияси қурилиш давридаги мажбуриятларининг бажарилишини таъминлаш учун 8 млн доллар миқдорида банк кафолати тақдим этади.

Шунингдек, чиқиндиларни утилизация қилиш ва қайта ишлашга ихтисослашган саноат зонаси ташкил этилиши, лойиҳа учун зарур электр ва бошқа инфратузилма объектлари барпо этилиши кўзда тутилган.

Қарорда лойиҳа доирасида жалб этиладиган хорижий мутахассислар ва уларнинг оила аъзолари учун виза ҳамда яшаш масалаларида айрим енгилликлар ҳам белгиланган.

Бундан ташқари, лойиҳа ҳужжатлари экологик экспертизадан ўтказилиши, шунингдек, табиатни муҳофаза қилиш бўйича белгиланган талабларга қатъий риоя этилиши шарт.