Истанбул–Тошкент рейси 3 соатдан ортиқ кечикди: Рақобат қўмитаси ўрганиш бошлади
Йўловчиларга зарур ахборот ва хизматлар кўрсатилгани ҳамда истеъмолчилар ҳуқуқларига риоя этилгани текширилмоқда.
Ижтимоий тармоқларда “Centrum Air” авиакомпаниясининг Истанбул–Тошкент йўналишидаги С6302 рейси 3 соатдан ортиқ кечиккани ва бу ҳолат йўловчилар эътирозига сабаб бўлгани ҳақида хабарлар тарқалди.
Мазкур ҳолат Рақобат қўмитаси томонидан назоратга олиниб, ўрганилмоқда.
Ўрганиш давомида, хусусан, рейс кечикиши вақтида йўловчиларга зарур ахборот берилгани, тегишли хизматлар кўрсатилгани ҳамда истеъмолчилар ҳуқуқлари таъминланганига эътибор қаратилмоқда.
Қўмита ўрганиш якунлари бўйича қонунбузарлик ҳолатлари аниқланган тақдирда, ўз ваколатлари доирасида тегишли таъсир чораларини кўришини маълум қилди.
Фуқаролар авиаташув хизматлари кўрсатишда истеъмолчилар ҳуқуқларига риоя этилмаслиги билан боғлиқ ҳолатлар юзасидан Рақобат қўмитасининг 1159 ягона ишонч телефони орқали мурожаат қилишлари мумкин.
Қўмита маълумотига кўра, бугунги кунгача “Centrum Air” ва бошқа авиакомпаниялар хизматларидан норозилик юзасидан 270 дан ортиқ мурожаат келиб тушган.
Шунингдек, амалдаги қоидаларга авиакомпания айби билан парвоз белгиланган жадвалдан кечиктирилган ёки йўловчи манзилига кеч етказилган ҳолатларда пул компенсацияси миқдори ва уни тўлаш тартибини белгилаш бўйича Транспорт вазирлигига бир неча кўрсатмалар берилган.
Ҳозирда истеъмолчилар ҳуқуқларини ҳимоя қилишни таъминлаш бўйича қонунчиликни такомиллаштириш ишлари давом эттирилмоқда.
“Centrum Air” рейси бўйича ўрганиш якунлари юзасидан қўшимча маълумот тақдим этилиши маълум қилинди.
