Пенсияни кўпайтириб бериш ваъдаси: Урганчда ҳоким ёрдамчиси ушланди
У фуқаронинг турмуш ўртоғи пенсиясини ошириб беришни ваъда қилиб, ундан 15 млн сўм олган.
Бош прокуратура ҳузуридаги Департаментнинг Хоразм вилояти бошқармаси ҳамда бошқа ҳуқуқни муҳофаза қилувчи органлар ходимлари ҳамкорлигида тезкор тадбир ўтказилган.
Унда Урганч шаҳрининг «Жамбал» маҳалласида тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ҳоким ёрдамчиси Б. Х. фуқаро Ш. Ю. нинг ишончига кириб, гўёки юқори лавозимларда ишловчи танишлари орқали унинг турмуш ўртоғи З. К. нинг ёшга доир пенсия миқдорини ошириб беришини ваъда қилгани аниқланган.
Бунинг эвазига Б. Х. Ш. Ю. дан 15 млн сўмни фирибгарлик йўли билан олгани айтилмоқда. Шундан 14,9 млн сўмини қайтариб бераётган вақтида у тезкор тадбир давомида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилган. Ҳозирда тергов ҳаракатлари олиб борилмоқда.
