12 та машина иштирокидаги ЙТҲ ва 3 киши ҳалок бўлди: Россияда ўзбекистонлик ҳайдовчи қамалди
Ўзбекистон фуқароси ҳайдовчилик гувоҳномасисиз, тормоз тизими носоз ва меъёридан ортиқ юкланган Shacman самосвалини бошқариб, ЙТҲга сабаб бўлган.
Россиянинг Уфа шаҳрида 12 та транспорт воситаси иштирокидаги йирик йўл-транспорт ҳодисасини содир этиб, уч кишининг ўлимига сабаб бўлган Ўзбекистон фуқаросига ҳукм чиқарилди. Бу ҳақда Бошқирдистон прокуратурасига таяниб, «Коммерсантъ» хабар берди.
Аниқланишича, 28 ёшли эркак 2025 йил октябрь ойида ҳайдовчилик гувоҳномасисиз Shacman самосвалини бошқарган. Юк машинасининг тормоз тизими носоз бўлган. Шунингдек, транспорт воситаси меъёридан ортиқ юкланган. Ҳайдовчи эса автомобилнинг техник ҳолати ва йўл шароитларини ҳисобга олмаган ҳамда белгиланган тезликдан ошган.
Натижада у юк машинасини бошқаришни йўқотиб, Уфимское шоссе ва Чудской кўчалари кесишмасидаги тартибга солинган чорраҳага яқинлашаётганда 12 та транспорт воситаси билан тўқнашган.
Ҳодиса оқибатида уч киши ҳалок бўлган, бир йўловчи оғир тан жароҳати олган.
Уфа шаҳри Октябрь туман суди ҳайдовчини йўл ҳаракати қоидаларини бузгани ва эҳтиётсизлик оқибатида икки ёки ундан ортиқ кишининг ўлимига сабаб бўлгани учун айбдор деб топган.
Суд ҳукмига кўра, унга 9 йил муддатга озодликдан маҳрум қилиш жазоси тайинланган. Шунингдек, жазони ўтаб бўлганидан кейин яна 3 йил муддатга транспорт воситасини бошқариш ҳуқуқидан маҳрум қилинган.
