2,1 млрд куб метр сув йўқотилмоқда: Қорақалпоғистонда каналлар бетонланади
Қорақалпоғистонда 417 минг гектар экин ерини суғоришга йилига 5,7 миллиард куб метр сув сарфланмоқда. Шундан 38 фоизи, яъни 2 миллиард 100 миллион куб метр сув йўқотилмоқда.
Йиғилишда сув йўқотишларини камайтириш ва мавжуд сув ресурсларидан самарали фойдаланиш бўйича қатор вазифалар белгиланди.
Жумладан, Тўрткўлдаги «Ёнбош» каналидан йилига 115 миллион куб метр сув ўтади. Унинг 44 миллион куб метри йўқотилмоқда. Канални тўлиқ бетонлаш орқали яна 9 минг гектар ерга сув етказиш ҳамда 15 минг бош қорамол учун озуқа базасини яратиш мумкин.
Бўзатовдаги «Эркиндарё» каналининг 8 километр қисмини бетонлаш ҳисобига фойдаланиладиган ер майдони 3 минг гектарга кўпаяди. Шунингдек, 15 минг гектар ернинг сув таъминоти яхшиланади.
Бу ҳудудда 3 та сув иншооти ва 22 та артезиан қудуқ барпо этилиши яна 5 минг гектар озуқа майдонини яратиш имконини беради.
Мазкур ишларни амалга ошириш учун жами 135 миллиард сўм ажратилади. Икки канални келгуси йил 1 мартгача бетонлаш топширилди.
Шунингдек, Тўрткўл ва Бўзатовда келаси йили 17 минг гектар майдонда озуқа экинлари етиштириб, 2 минг кишини даромадли қилиш вазифаси белгиланди.
Сув объектларини модернизация қилиш борасида Япониядан 4,5 миллион долларлик грант жалб қилингани ижобий тажриба сифатида қайд этилди. Келаси йили бундай грантлар ҳажмини 100 миллион долларга етказиш топширилди.
Сув хўжалигида энергия самарадорлигини ошириш бўйича ҳам ишлар олиб борилмоқда. Ўтган йили 30 миллиард сўм ҳисобига 276 та сув насоси энергия тежамкор ускуналарга алмаштирилди. Натижада йилига 16 миллион киловатт-соат электр энергияси тежалмоқда.
1 апрелгача Қорақалпоғистондаги 59 та ҳамда бошқа вилоятлардаги яна 200 та сув насосини янгилаш вазифаси қўйилди.
