АI хатоси: АҚШ-Хитой уриши бошланишига сал қолди

АҚШ ҳарбийлари сунъий интеллект ёрдамида тайёрланган хато разведка ҳисоботи сабаб Яқин Шарқда Хитойга тегишли кемани ушлаш ва унинг бортига чиқишга деярли киришган. Бу ҳақда СNN тўрт нафар манбасига таяниб хабар берди.

Маълум қилинишича, 2026 йил баҳорида, АҚШнинг Эронга қарши ҳарбий амалиётлари давом этаётган пайтда, АҚШ ҳарбийлари орасида Хитой кемаси ядровий қурол дастурига алоқадор қисмларни ташиётгани ҳақидаги разведка ҳисоботи тарқалган.

Шундан сўнг кемани ушлаш бўйича операция режалаштирилган. СNN манбаларига кўра, қуролланган ҳарбий хизматчилар кемага чиқишга тайёрланган, ҳарбий самолётлар эса ҳавога кўтарилган.

Бироқ операция бошланишидан бироз олдин расмийлар ҳисоботни батафсил текширган. Шунда унинг сунъий интеллект ёрдамида тайёрлангани ва таҳлилда фойдаланилган чатбот кема бортидаги юкни нотўғри аниқлагани маълум бўлган.

СNN маълумотига кўра, махсус операциялар қўмондонлиги таҳлилчиси кема юк манифестига оид маълумотларни чатбот орқали таҳлил қилган. Тизим очиқ манбалардаги маълумотларни ҳукумат ихтиёридаги махфий сигнал разведкаси маълумотлари билан бирлаштириб, нотўғри хулоса чиқарган. Кейинчалик ушбу хулоса яна АI ёрдамида ҳарбий разведка ҳисоботига айлантирилган ва тегишли каналлар орқали тарқатилган.

Кема аслида қандай юк ташиётгани эса ҳозирча очиқланмаган.

СNN манбаларидан бири ҳисоботни “мутлақо ёлғон” деб атаган ва воқеа “деярли урушни бошлаб юборганини” билдирган. Чунки Хитой кемасига қарши АҚШ ҳарбийларининг бундай операцияси икки давлат ўртасида жиддий ҳарбий кескинликни келтириб чиқариши мумкин эди.