Электр ишлаб чиқариш 4 карра ошди: Қорақалпоғистон “яшил” энергия марказига айланади

Нукус шаҳрида Президент Шавкат Мирзиёев раислигида Қорақалпоғистонни ижтимоий-иқтисодий ривожлантириш масалаларига бағишланган йиғилиш бўлиб ўтмоқда.

Давлат раҳбари мустақиллигимизнинг 35 йиллик байрами шукуҳи давом этаётган кунларда Қорақалпоғистон аҳли билан юзма-юз кўришиб турганидан мамнунлигини билдирди.

Таъкидланганидек, сўнгги йилларда ҳудудни ривожлантириш учун катта маблағ, имтиёз ва шароитлар яратилди. Жумладан, фойда, ер ва мол-мулк солиқлари 2 карра, саноат учун электр тарифи 15 фоизга пасайтирилди. Ижтимоий солиқ ставкаси эса 1 фоиз этиб белгиланди.

Ўтган йили Қорақалпоғистонга 1 миллиард 700 миллион доллар инвестиция киритилди. Бу кўрсаткич 2021 йилга нисбатан 22 карра кўп.

Жорий йилнинг биринчи ярмида ҳудуд иқтисодиёти 10,2 фоиз ўсди. Натижада Қорақалпоғистон иқтисодий ўсиш суръатлари бўйича Тошкент шаҳридан кейинги иккинчи ўринни эгаллади.

Энергетика соҳасида ҳам сезиларли натижаларга эришилган. Сўнгги йилларда ҳудудда 860 мегаваттли янги энергетика қувватлари ишга туширилди. Беруний ва Қораўзак туманларида шамол электр станцияларининг қурилиши ҳисобига «яшил» энергиянинг улуши 23 фоизга етди.

Электр энергияси ишлаб чиқариш ҳажми эса 4 карра ошиб, 5 миллиард 330 миллион киловатт-соатни ташкил этди. Бу аҳоли ва корхоналарнинг йиллик эҳтиёжидан қарийб 3 баробар кўп.

Йиғилишда Қорақалпоғистонда энергетика салоҳиятини янада кенгайтиришга қаратилган янги лойиҳалар ҳақида ҳам маълумот берилди. Кеча ҳудудда умумий қиймати 7 миллиард долларлик 47 та янги лойиҳани амалга оширишга старт берилди.

Жумладан, Қўнғирот туманида 2 миллиард 600 миллион долларлик, қуввати 1,5 минг мегаватт бўлган шамол электр станциясини қуриш бошланди. Лойиҳа доирасида 1,5 минг километр юқори кучланишли электр тармоқлари ҳамда 500 киловолтли 3 та подстанция барпо этилади.

2030 йилгача Қорақалпоғистонда умумий қуввати 3 минг 300 мегаватт бўлган шамол электр станцияларини ишга тушириш режалаштирилган. Натижада «яшил» энергиянинг ҳудуддаги улуши 76 фоизга етказилади. Шунингдек, 400 мегаваттли энергия сақлаш қувватлари яратилади.

Бу лойиҳалар амалга оширилиши натижасида Қорақалпоғистон «яшил» энергия ишлаб чиқариш бўйича минтақанинг энг йирик марказларидан бирига айланиши кутилмоқда.