Эронда намойиш: юз минглаб одам АҚШга қарши намойишга чиқди
Теҳронда ҳукумат томонидан ташкил этилган митингда янги кўнгиллилар кучи намойиш қилиниб, иштирокчилар мамлакатни ҳимоя қилишга тайёр эканини билдирди.
18 сентябрь куни Теҳронда юз минглаб одам иштирокида АҚШга қарши йирик намойиш ўтказилди. Тадбирда ҳукумат томонидан яқинда тузилган кўнгиллилар кучи намойиш қилиниб, унинг аъзолари қуролли ва фавқулодда вазиятларга жавоб бериш бўйича чекланган тайёргарликдан ўтиши маълум қилинди.
Намойиш иштирокчилари Теҳрон марказидаги кўчалардан ҳарбий кийимларда ўтган. Айримлари байроқ ва қуролларни кўтарган. Тадбир давомида дронлар, зенит мудофаа тизимлари ва бошқа ҳарбий техника ҳам намойиш этилган.
Эрон расмийлари митингда 313 минг киши қатнашганини билдирди. Бироқ бу рақамни мустақил равишда тасдиқлашнинг имкони бўлмаган. Эрон Инқилобий гвардияси қўмондони Ҳасан Ҳассанзода эса янги кўнгиллилар кампаниясида 600 мингдан ортиқ киши рўйхатдан ўтганини, машғулотларга бир миллиондан ортиқ одам жалб этилиши кутилаётганини айтди.
“Эрон учун жонини фидо қилишга тайёрлар” мазмунини англатувчи «Janfada-e Iran» кампанияси доирасида ташкил этилган куч мамлакат хавфсизлик тизимида қўшимча қатлам сифатида хизмат қилиши кўзда тутилган. Эрон расмийлари бу ташаббусни мамлакатни эҳтимолий янги можаро ва хавфларга тайёрлаш стратегиясининг бир қисми сифатида кўрсатмоқда.
Намойишда Эрон президенти Масъуд Пезешкиён ва Басиж кучлари раҳбари Ҳусайн Тоиб ҳам қатнашди. Тоиб кўнгиллилар “тўлақонли мудофаа”га тайёр бўлишини таъкидлади. Митинг АҚШнинг Эрон портларига нисбатан денгиз блокадаси ва янги санкциялар фонида ўтказилди. Эрон Ташқи ишлар вазирлиги вакили Исмоил Бағоий Вашингтоннинг иқтисодий босимини кескин танқид қилди.
Маълумотларга кўра, янги кўнгиллиларни сафарбар қилиш кампанияси АҚШ ва Исроилнинг Эронга қарши ҳужумлари кучайган даврда, апрель ойида бошланган. Эрон расмийлари потенциал сафарбарлик учун 30 миллиондан ортиқ одам рўйхатдан ўтганини билдирган.
