Хорижий ҳамкорлар эътибори ортмоқда: Қорақалпоғистонда қатор йирик лойиҳаларга старт берилди
Саида Мирзиёева Қорақалпоғистонга ташриф давомида янги тиббиёт академияси, саноат корхоналари ва интенсив боғларни кўздан кечирди.
Саида Мирзиёева Президент Шавкат Мирзиёев билан бирга Қорақалпоғистонда амалга оширилаётган қатор лойиҳалар ва объектлар билан танишди.
Ташриф давомида янги тиббиёт академияси, саноат корхоналари ҳамда интенсив боғлар кўздан кечирилиб, ҳудуд аҳолисининг бандлигини таъминлаш ва даромадларини ошириш учун яратилаётган имкониятлар билан танишилди.
Ташрифнинг асосий воқеаларидан бири энергетика, саноат, транспорт, тиббиёт, рақамли инфратузилма ва бошқа соҳалардаги қатор йирик лойиҳаларга старт берилгани бўлди.
Саида Мирзиёева янги лойиҳаларнинг аксарияти нуфузли хорижий ҳамкорлар билан биргаликда амалга оширилаётганини таъкидлади.
Унинг қайд этишича, Қорақалпоғистонга йўналтирилаётган инвестициялар ҳажмининг ортиши ва янги салмоқли лойиҳаларнинг кўпайиши хорижий ҳамкорларнинг Ўзбекистонга бўлган ишончи ҳамда эътибори тобора ортиб бораётганини кўрсатмоқда. Бу, шунингдек, мамлакатда тадбиркорлик ва инвестиция фаолияти учун яратилаётган қулай шароитларнинг амалий натижасидир.
Саида Мирзиёева сармоялар оқимини янада кучайтириш, халқаро ҳамкорлар сафини кенгайтириш ҳамда кўлами янада йирик янги лойиҳаларни ишга тушириш изчил давом эттирилишини таъкидлади.
