Ресурсдан тайёр маҳсулотгача: Қорақалпоғистонда янги саноат ва инвестиция харитаси яратилади
Уч йилда 1,5 минг юқори даромадли иш ўрни яратиш ва рақамли технологиялар экспортини 600 миллион долларга етказиш режалаштирилмоқда.
Шавкат Мирзиёев Қорақалпоғистонда мавжуд табиий ва энергетик салоҳиятдан самарали фойдаланиш, янги саноат тармоқларини ривожлантириш бўйича вазифаларни белгилаб берди.
Давлат раҳбари ҳудудда ер, қазилма бойликлар, қуёш ва шамол энергияси, шунингдек, катта яйловлар мавжудлигини қайд этди.
Ушбу имкониятлардан келиб чиқиб, “ресурсдан тайёр маҳсулотгача” бўлган занжирни қамраб олувчи янги саноат ва инвестиция харитаси яратилади.
Шунингдек, «Қўнғирот–Қораўзак–Тахиатош» йўналиши Қорақалпоғистоннинг “яшил саноат йўлаги” ҳамда “интеллектуал иқтисодиёт учбурчаги”га айлантирилади.
Сунъий интеллект ва дата-марказ лойиҳаларини амалга ошириш учун ташкил этилган махсус зонада умумий қиймати 8 миллиард долларлик 6 та лойиҳа амалга оширилиши белгиланди.
Мутасаддиларга 1 октябргача ушбу йўналиш бўйича беш йиллик дастур ишлаб чиқиш топширилди. Унда инвесторлар учун 1 гигаватт қувватга эга барқарор электр таъминотини йўлга қўйиш масаласига алоҳида эътибор қаратилади.
Шунингдек, уч йил давомида Нукус шаҳри, Қўнғирот, Қораўзак ва Тахиатош ҳудудларида 1,5 мингта юқори даромадли иш ўрни яратиш вазифаси белгиланди.
Булутли технологиялар ва сунъий интеллект соҳасида хизматлар экспортини ривожлантириш орқали йиллик экспорт ҳажмини 600 миллион долларга етказиш мақсад қилинган.
