Тошкентда кредит қарзи сабаб электомобил хатланди
Ҳозирги мазкур автотранспорт воситасини электрон савдоларга чиқариш бўйича тегишли чора-тадбирлар амалга оширилмоқда.
МИБнинг Тошкент шаҳар бошқармаси Алоҳида муҳим ижро ишларни ижро этиш шўъбаси инспектори М.Нўмонжонов иш юритувига ФИБ Миробод туманлараро судининг 2026 йил 23 августдаги ижро варақаси асосида қарздор Т.Т.дан ундирувчи банк ХАТБ фойдасига 232 225 796 сўм миқдоридаги кредит қарздорлигини ундириш ҳамда ундирувни қарздорга тегишли бўлган, “Changan Shenlan SL03” русумли автотранспорт воситасига қаратиш тўғрисидаги ижро ҳужжати 2026 йил 2 сентябрь куни иш юритувга келиб тушган.
Мазкур ижро ҳужжати асосида шу куннинг ўзида ижро иши юритиш тўғрисида қарор қабул қилиниб, қонунчилик талабларига мувофиқ, қарздорга қарздорликни ихтиёрий равишда қоплаш учун муддат белгиланган.
Бироқ белгиланган муддат давомида қарздорлик ихтиёрий равишда бартараф этилмаганлиги сабабли, мажбурий ижро ҳаракатларини амалга оширишга киришилган.
Ижро ҳаракатлари давомида гаров мулки сифатида қайд этилган, қимматбаҳо автотранспорт воситаси белгиланган тартибда хатланиб, унга нисбатан қонунчиликда назарда тутилган чоралар кўрилган.
Ҳозирги вақтда мазкур автотранспорт воситасини белгиланган тартибда “E-AUKSION” электрон савдоларига чиқариш бўйича тегишли чора-тадбирлар амалга оширилмоқда.
