Тошкентда МИБ орқали маданий буюмлар музейга қайтарилди
Шу тариқа ижро ҳужжатида белгиланган талаблар тўлиқ бажарилиб, ижро иши якунланди.
Мажбурий ижро бюросининг Янгиҳаёт туман бўлими иш юритувида жиноят ишлари бўйича Сирғали туман судининг 2024 йил 2 октябрдаги ижро варақасига асосан, ҳуқуқбузар чет эл фуқаросига оид маъмурий иш бўйича далилий ашё сифатида олинган мол-мулкларни давлат даромадига ўтказиш тўғрисидаги ижро ҳужжати мавжуд бўлган.
Мазкур ижро ҳужжати 2024 йил 25 октябрь куни Бюронинг Янгиҳаёт туман бўлими иш юритувига келиб тушган. Унга кўра, далилий ашё сифатида олиниб, 1536-сонли юк хати асосида “Bojxona-servis” ДМга вақтинча сақловга топширилган 1 дона “Кварц 2” ёзувли кинокамера, 1 дона оқ рангли металл штатив ҳамда 1 дона “Ленинград 2” ёзувли фотоэкспонометрни белгиланган тартибда давлат даромадига ўтказиш назарда тутилган.
Суд қарорининг аниқланган ҳолатлар қисмида қайд этилганидек, Ўзбекистон Республикаси Маданий мерос агентлиги Бадиий экспертиза бошқармаси бош мутахассислари томонидан 2024 йил 15 август куни ўтказилган экспертиза натижасига кўра, мазкур ашёлар маданий ва тарихий аҳамиятга эга экани аниқланган.
Амалдаги тартибга кўра, тарихий, илмий, бадиий ва бошқа маданий қимматга эга бўлган мол-мулклар кейинчалик давлат музейлари ҳамда илмий муассасаларга текин бериш учун тегишли тартибда топширилади.
Шундан келиб чиқиб, мазкур маданий ва тарихий аҳамиятга эга ашёлар 2026 йил 14 сентябрь куни тегишли далолатнома асосида Ўзбекистон киносанъати музейига топширилди.
