1,293 млрд сўмлик заргарлик буюмлари: “Дубай–Тошкент” рейсида ноқонуний юк аниқланди
Ўзбекистонга кириб келган фуқаронинг юкидан декларацияда кўрсатилмаган 921,37 грамм заргарлик буюмлари ва 3 дона олтин қуйма топилган.
Тошкент халқаро аэропортида «Дубай–Тошкент» йўналиши бўйича Ўзбекистонга кириб келган фуқаронинг юкидан декларацияда кўрсатилмаган олтин ва заргарлик буюмлари аниқланди.
«Тошкент-АЭРО» ихтисослаштирилган божхона комплекси ходимлари томонидан фуқаронинг юклари божхона назоратидан ўтказилганда, декларацияда қайд этилмаган заргарлик буюмлари ва олтин қуймалар аниқланган.
Хусусан, юклар орасидан соф оғирлиги 921,37 грамм бўлган 141 дона заргарлик буюми ҳамда 3 дона олтин қуйма топилган.
Экспертиза хулосасига кўра, аниқланган заргарлик буюмлари ва олтин қуймаларнинг умумий қиймати 1 миллиард 293 миллион сўмни ташкил этган.
Бундан ташқари, фуқаронинг юкидан акциз маркалари бўлмаган 120 қути тамаки маҳсулоти ҳамда 90 дона никотинли снюс аниқланган.
Ҳолат юзасидан жиноят иши қўзғатилган. Ҳозирда тергов ҳаракатлари олиб борилмоқда.
