Дунёда дизель тақчиллиги кучаймоқда: танқислик 2027 йилгача давом этиши мумкин

Жаҳонда дизель ёқилғиси захиралари тарихий энг паст даражага тушиб, нархлар рекорд кўрсаткичларга яқинлашмоқда. Таҳлилчиларга кўра, ёқилғи тақчиллиги 2027 йилгача давом этиши мумкин.

 

Reuters маълумотларига кўра, Яқин Шарқ ва Россиядан кунига миллионлаб баррель нефть маҳсулотлари етказиб берилишига ҳарбий ҳаракатлар таъсир кўрсатмоқда. АҚШда дизель ёқилғисининг чакана нархи сентябрь ойида илк бор бир галлон учун 6 доллардан ошган.

 

АҚШ Энергетика ахборот бошқармаси маълумотига кўра, мамлакатдаги дизель захиралари 107,9 миллион баррелгача камайган. Бу 1982 йилдан буён йилнинг шу даври учун қайд этилган энг паст кўрсаткичдир.

 

Таҳлилчилар захиралар 100 миллион баррелдан ҳам пастга тушишини ва 2026 йил охиригача, шунингдек, 2027 йилнинг катта қисмида сўнгги беш йиллик ўртача даражадан паст бўлиб қолишини прогноз қилмоқда.

 

Европанинг Амстердам–Роттердам–Антверпен (АРА) нефть маҳсулотлари марказида июль ойида дизель захиралари сўнгги беш йилдаги ўртача кўрсаткичдан 16 фоизга паст бўлган. Сингапурда эса дистиллят ёқилғилари захираси 8,2 миллион баррелни ташкил этган. Бу ўтган йилги 9,6 миллион баррелдан кам.

 

Россиянинг дизель экспортига қўйилган чекловларни октабр охиригача узайтириши кутилмоқда. Бу жаҳон бозорига ёқилғи етказиб берилишини янада қисқартириши мумкин.

 

Шу билан бирга, Хитой экспортининг ошиши ва нефтни қайта ишлаш корхоналарининг юқори рентабеллик билан ишлаётгани бозордаги босимни қисман юмшатмоқда.

 

Экспертлар Яқин Шарқ ёки Украинадаги ҳарбий ҳаракатларнинг янада кучайиши, шунингдек, йирик нефтни қайта ишлаш заводларидан бирида авария юз бериши ёқилғи нархларининг кескин ошишига олиб келиши мумкинлигидан огоҳлантирмоқда.

 

Жаҳон бозорида ёқилғи таъминоти нефтни қайта ишлаш қувватларининг чеклангани, Россия экспортига қўйилган чекловлар ва қишки талабнинг ошиши сабаб камида совуқ мавсум охиригача чекланган даражада қолиши кутилмоқда.