Омонатдаги пулни ўзлаштириш: Тошкентда банк масъулларига жиноят иши қўзғатилди
Тижорат банки масъуллари фуқаро номидан қалбаки ҳужжатлар расмийлаштириб, унинг омонатидаги 300 минг долларни ўзлаштирган.
Бош прокуратура ҳузуридаги Департаментнинг Сергели тумани бўлими томонидан ўтказилган терговга қадар текширув давомида тижорат банкларидан бирида фуқаронинг омонатидаги маблағлар ўзлаштирилгани аниқланган.
Маълум бўлишича, банкнинг масъул шахслари фуқаро И.М. номидан қалбаки ариза ва бошқа ҳужжатларни расмийлаштириб, унинг банкдаги 500 минг АҚШ доллари миқдоридаги омонатидан 300 минг долларни ўзлаштириб, талон-торож қилган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ҳамда 228-моддаси (ҳужжатлар, штамплар, муҳрлар ва бланкаларни тайёрлаш, қалбакилаштириш, сотиш ёки улардан фойдаланиш) билан жиноят иши қўзғатилган.
Ҳозирда иш доирасида тергов ҳаракатлари олиб борилмоқда.
