Пул, телефон ва соатларни зўрлик билан тортиб олишди: Наманганда 7 нафар талаба ушланди
Техникум талабалари 4 нафар тенгдошининг буюмларини очиқдан-очиқ зўрлик ишлатиб тортиб олди.
Ижтимоий тармоқларда Наманган шаҳрида бир гуруҳ ёшлар бошқа ёшларнинг буюмларини зўрлик билан олиб қўяётгани акс этган видеолар тарқалди.
Мазкур ҳолат Наманган вилояти Ички ишлар бошқармаси томонидан ўрганилган.
Аниқланишича, 19 сентябрь куни соат 13:00 ларда Наманган шаҳрининг «Даштбоғ» маҳалласи ҳудудида 2010 йилда туғилган, 2-сонли касб-ҳунар техникумининг 1-босқичида таҳсил олувчи 7 нафар талаба шу техникумнинг 1-босқичида ўқийдиган 4 нафар тенгдошининг ёнидаги пул, соат ва телефонларни очиқдан-очиқ зўрлик ишлатиш йўли билан олиб қўйган.
Терговга қадар ўтказилган текширув давомида видеотасвирда акс этган барча иштирокчиларнинг шахсига аниқлик киритилган.
Шунингдек, мазкур воқеа оқибатида ҳеч ким тан жароҳати олмагани аниқланган.
Ҳолат юзасидан Наманган шаҳар ИИБ ҳузуридаги Тергов бўлими томонидан Жиноят кодексининг 166-моддаси 2-қисми «в» банди — бир гуруҳ шахслар томонидан содир этилган талончилик бўйича жиноят иши қўзғатилган.
Ҳозирда дастлабки тергов ҳаракатлари олиб борилмоқда.
