Ўрмон ёнғинлари хавфи: Франциянинг учта департаментида қизил даража эълон қилинди
Ҳавонинг қуруқлиги ва секундига 15 метргача бўлган шамол ёнғинлар тарқалиши хавфини оширмоқда.
Мамлакат миллий метеорология хизмати Météo-France маълумотларига кўра, қизил хавф даражаси Пиреней-Ориенталес, Од ва Гар департаментларига жорий этилган.
Ҳудудларда ҳаво ҳарорати 34 даражагача кўтарилиши кутилмоқда. Паст намлик ва секундига 15 метргача етадиган шамол эса ёнғинларнинг юзага келиши ва тез тарқалиши хавфини оширмоқда.
Бундан ташқари, яна бешта департаментда ўрмон ёнғинлари хавфи тўқ сариқ даражага кўтарилган.
Météo-France маълумотларига кўра, 2026 йил Францияда ўрмон ёнғинлари бўйича рекорд мавсумлардан бири бўлмоқда. Ёз давомида камида битта департаментда ёнғин хавфи қизил даражада бўлган кунлар сони 27 тага етган. Шунингдек, 8 июндан 20 августгача 74 кун давомида камида битта департаментда ёнғин хавфи юқори ёки жуда юқори бўлган.
Météo-France қайд этишича, юқори ҳарорат, ёғингарчиликнинг камлиги, тупроқ ва ўсимликларнинг қуруқлиги ҳамда кучли шамоллар ёнғин хавфини сезиларли даражада оширган.
Таъкидланишича, вазият айрим ҳудудларда сентябрь ойида ҳам хавфли бўлиб қолиши мумкин.
