Токиода тайфун хавфи: 524 та рейс бекор қилинди
Дужуан тайфуни сабаб Токиода авиақатновлардан ташқари поезд ва паром қатновлари ҳам чекланмоқда.
Кучли Дужуан тайфуни Токио метрополитен ҳудудига яқинлашаётгани сабабли Ҳанеда ва Нарита халқаро аэропортларида камида 524 та рейс бекор қилинди. Бу ҳақда ТАСС парвоз маълумотларига асосланган ҳисоб-китобларига таяниб хабар берди.
Ҳанеда аэропортида 300 дан ортиқ ички ва қарийб 60 та халқаро рейс бекор қилинган. Нарита аэропортида эса 100 дан ортиқ, асосан халқаро рейслар амалга оширилмаган.
Ноқулай об-ҳаво транспорт қатновларига ҳам таъсир кўрсатмоқда. Токиодан туташ Чиба префектурасининг айрим йўналишларида поездлар ҳаракати тўхтатилган. Токио кўрфазидаги паром қатновлари бекор қилинган, Томеи тезюрар автомобиль йўлининг айрим қисмлари эса юқори тўлқинлар сабаб ёпилган.
JR Tokai компанияси Токио ва Осака ўртасидаги асосий йўналишда тезюрар поездлар қатнови ҳам бекор қилиниши мумкинлигидан огоҳлантирган.
Тайфун Хонсю оролининг марказий Тинч океани соҳиллари жанубида жойлашган бўлиб, шимоли-шарқ томон соатига қарийб 25 километр тезликда ҳаракатланмоқда. У аввал Изу яриморолига, кейин эса Токио ҳудудига яқинлашиши кутилмоқда.
Синоптиклар кучли ёмғир, дарёларнинг тошиши ва кўчкилар хавфидан огоҳлантириб, аҳолини имкон қадар уйда қолишга чақирмоқда. Чиба префектурасининг айрим ҳудудларида эвакуация бўйича огоҳлантиришлар ҳам кучга кирган.
Тайфун кучли шамол ва жала билан кечмоқда. Айрим ҳудудларда сўнгги икки кун давомида 410 миллиметрдан ортиқ ёмғир ёғган. Синоптиклар айрим жойларда ёғингарчилик миқдори соатига 80 миллиметргача етиши мумкинлигини прогноз қилмоқда.
